這篇文章由我們的其中一個 Project Manager 大佬碩寫，說明做戶外推廣活動及到商場擺 Booth 時的注意事項。當然，企街派全單跟找一架流動貨車做戶外宣傳分別都大，這篇主要講述較小規模的推廣活動，希望幫到大家。
經過一連串既推廣項目，我地都累積左唔少經驗同心得，借今次機會我都想分享一下哩推廣活動既點點滴滴，哩篇文純粹分享唔係出黎揾生意,希望大家睇完哩篇分享文章，日後大家在戶外搞推廣宣傳活動時都可以順順利利~
戶外推廣事前準備:
最好就係自己親身去視察下環境，如果時間同金錢可以的話，最好試下搭公共交通工具同埋的士去;
我就曾經試過接過一個客人，要求早上7點鐘喺沙田派傳單，但公司喺觀塘，開檔前我要先到公司準備傳單和禮品再到沙田~起初都只係諗早點起身姐,一兩日姐~ 我預算係5:45搭地鐵，6點15再出車~怎料原來頭一班地鐵要6:00先有車~結果我準時出到門口，但我要等車開,等到6點25先返到公司，再超趕急咁執好野出車~差少少就搞到第一日就遲到~ (你要做這個準備，因為 Promoter 也要搭車，要做比較合理的預算)
早上派贈品基本上不會有太多機會跟途人溝通，說實話個個趕住番工，那會停下來呢!
又曾經試過客人要求下午6點開工，咁我就諗住5點3搭的士過去，怎料遇到香港特有”的士揀客” 及的士交更，截左好有一段時間都截唔到的士，最後我見勢色唔對路立即轉地鐵去現場，好彩都唔洗遲到~
所以我建議大家如果公司同推廣活動地點唔太近的話，最好事前自己要去一去果度，試一試如果唔係自己揸車/的士時,搭咩車先去到現場~
戶外推廣 – 如何選擇檔口及位置:
親身去視察環境是重要的一環，首先當然是要留意一下你可以放置你的檔口既位置，最好當然係擺放得越近你班promoter越好 ! 方便佢地派完一輪就去補給，咁佢地又唔洗一次過拎住太多贈品同埋宣傳單張，減低工作時受傷機會!
另外要主要既是擺放位置會唔會阻塞人流:
係人都知將個booth擺喺最多人流既地方同埋最顯眼既地方係會宣傳有幫忙，但係如果阻塞到人流的話又會搞到場面混亂，有陣時仲會俾警察/食環署趕，所以選擇地點要小心~咁當然如果申請左牌照擺檔既就另計喇~
其實而家一般唔申請牌照既戶外推廣活動多數都會在大型商場/地鐵站附近作宣傳活動，如果你地走得太近或在地鐵站範圍內派發係會俾在場職員趕的~
所以如果唔想俾人趕又想在多人數既地方派發呢就要好好運用d灰色地帶 ! 灰色地帶並唔係講緊有某d地方係灰色任你企任你擺檔~
其實每個商場每個地鐵站都會有佢地鋪既階磚就知邊度係佢地地契既範圍，如果你行返出公眾路段咁你就可以開檔派野喇~
港鐵範圍基本上一定會趕，像九龍灣地鐵站一條「駁」位區分
至於擺檔方面，字眼上係要流動，即係唔可以開一張枱去擺檔，易拉架當然也不可以!
其實一般唔太大唔太誇張，最重要係個檔只係用黎擺野，不是有廣告宣傳成份的，同時又唔阻街既，一般警察/食環都唔會趕你既~
私人機構範圍與公眾地方的範圍分界，通常我們都是看地上的磚頭去區分的，普遍商場範圍的地，多數會跟公眾範圍不同﹕
(Ringo: 這個要小心，我地就係試過誤用推廣推廣枱被罰 1500 元)
另外,如果唔想做死d戶外推廣員，戶外還戶外，你都要睇定個區有邊幾個位係有瓦遮頭，日頭就遮陰，落雨又可以避下雨~
最好就搵到d位近商場門口，d客人出出入入又有少少冷氣吹出黎就比較好~做老細做監場都要有少少良心，如果唔係第日真係搵鬼同你做喇~
(Ringo: 好似好體貼喎)
最後邊d地方先可以安全的擺檔真係區區唔同，因為每個地方都會有唔同既”食蕉”同食環，邊度手鬆邊度會係咁趕你走都好難逐一同大家係哩度分享~
不過我可以提醒各推廣員商場廣場無申請牌照一定唔可以入內派，基本上保安員唔黎搵你，可能警察都直接搵你。就算是近商場門口擺位派野也要如上文說一樣要識睇階磚地，看看是否是公共的行人路才可以派傳單。地鐵站範圍內也是，包括接駁地鐵站的行人天橋如九龍灣地鐵站，地鐵的職員是會追出來趕的，各位要注意!
如何選擇戶外推廣的地區:
其實好多時我地接到Order，客人多數都會提供區域，好多時都會叫返Agent自行選擇該區既旺點推廣，可能大家會覺得去當區最旺既大型商場/地鐵站附近擺放檔口~
經過多年的推廣活動,我可以答你地:未必架~
其實都要睇下你想要既目標客人係乜野階層乜野人
舉個例子,如果你既產品係補習社/playground,檔口在大型商場附近是有人流,但係攞單張既人又未必係你想要既目標客人,反而你移到去學校區附近擺檔,你可能接觸到更多你想要既目標客人~
還有該區是否適合做你產品既推廣呢?
舉多個例子:
如果你想宣傳既產品係一d名貴既產品如珠寶咁，你就唔會揀球場丫，運動場既地區，反而如果你既產品係健康飲品丫，止汗噴霧效果就完完全全唔同~大家都可以留意下哩點~
戶外推廣一定要留意天氣:
其實天氣哩家野無論做咩事都同樣重要，今次想講既如果天氣唔好既時候有乜野要準備~
其實天氣唔好，基本上你就要預算人流都唔會有太多~就算人流Keep到，你既客人一手擔遮一手拎住個袋，真係未必個個仲會攞你既宣傳單張~
所以你既預算都要有少少心理準備工作唔會太順利，我建議要自己調節一下宣傳單張買贈品的數量，如果可以的話，安排一些比較主動既推廣員。
前文都有講到客人未必個個得閒攞你d宣傳單張，但其實有d地方有瓦遮頭，其實都集結到一班避雨既客人，所以成日都講有危就有機，如果你搵到一班主動一d既推廣員可能你會有一個唔錯既效果~
有瓦遮頭的地方容許你有機會跟途人講解更多，但當然要視是否公眾地方
那個時段做戶外推廣最好? 假日及閒日?早晚更?
其實我以上所分既時段同日子最主要都係顧客既群組，先講講假日同閒日既分別先喇~
其實大家都應該知道，閒日大家都要返工放工，所以派傳單既位置喺公司寫字樓附近既效率都會好D; 而假日多數都一家大細咁出街，小心選擇推廣既日子都大大影響到你宣傳效果~
早更的宣傳活動，如果太早如朝早7點-8點可能收傳單的會係比較上左年紀既人士，飲早茶行晨運等活動~如果係d高科技產品,佢地係咪你既目標客人呢? 你就真係要諗下!
至於8點至10點，可能多左學生同上班人士，不過佢地都應該好趕時間返工返學，其實你同我都一樣試過，通常大家都會訓到最後一刻先出門口，出得門口都趕到死下死下，如果有人就欄住你路叫你下載軟件程式或要你分享網站或俾like，我諗你真係理佢都傻~
而我地就唔好勉強客人做哩d事喇，大家請記住~
夜更方面放工放學時段，客人需要都可能趕住買送煮飯或返屋企，不過相對起朝早辦工時間的話就無咁趕，如果對該宣傳品有興趣的話更樂意花時間聽下睇下個宣傳品，夜更我多數建議選一些耐性好口才同樣好的推廣員人做,效果會事半功倍丫~
推廣員也是重要的一環:
其實選擇推廣員時最好在面試時要看看他/她本人性格內向/外向，我都好明白面試果陣好難睇到咁多野， 所以通常我揀卒時都會揀一d唔太怕醜，性格爽朗d，多d野講，鍾意表達意見既會優先考慮~
當然最後就加埋親切既笑容同埋會好動d就更加好，講真你自己喺街度，見到派宣傳單張既人都可能會行開避一避喇~
如果d推廣員唔主動少少，變左真係請佢地返黎企街，到時公司未能預期派晒d宣傳品，客人又唔滿意你公司表現，公司又要白出糧俾員工，真係3重打擊~
之後既就要到返左工先知喇，準時既員工是非常重要，一個推廣既活動由一個團體去做，其實真係缺一不可，所以遲到缺勤無原無固消失者都一律要嚴懲~
通常我地都會定時定候問下各位推廣員同事，睇下佢地接觸到客人果陣會唔會有D特別既問題疑問，始終直接招待客人既都係最前線既同事，所以直接問佢地係最好既~
活動宣傳品及贈品
我地都曾經試過為客人製作不同宣傳品，有幾樣特別事宜可以提醒一下，例如而家好興印QR Code，方便攞宣傳單張既人去下載軟件，其實有d QR Code係分Android同Applestore的，我們試過只印了Android的QR Code，令好多用 IPhone 既客人都未能夠直接download到個軟件~
除了單張之外，如果客人想俾 Facebook like你，可以試下用自己公司既 Icon做公仔/印有 Icon既產品例如 紙巾/扇丫/鎖匙扣，正常情況下以上贈品應該不會立即被棄掉，及有機會被重用。如果成本許可，派有icon既贈品係會比較受歡迎的。如果你做食品飲料，當然有得試食試飲就最吸引到人流喇!
至於有些客人想得到社交平台的正面回響，如在Instagm或 Facebook 有follow/like的話，不妨指定街上的人Download或 俾 Like才給他們贈品，但這策略成功與否都係取決於你本身個贈品吸唔吸引到客人注意。(還有一點，有部份人會攞完贈品後剷 Like 或 Apps，這是不能避免的，可以的話，Apps內最好已經有個預設優惠，透過 Promoter 鼓勵途人用這個優惠，增加 Apps的生命時間)
如果想增加市民主動對你的傳單或推廣活動有興趣，你們可以找人穿公仔服扮人偶，人偶的優點是很容易吸引到途人主動去了解你們的推廣，特別是如果你的產品係家長，小朋友會主動靠近公仔映相!
以上是小小心得，希望可以幫到各位推銷得更成功!
如果各位有戶外推廣的需要，也可以找我們俾下意見，記住，唔一定要幫襯的!
詳情可致電﹕2876 2875
講完戶外，又講下室內，做過多次室內的推廣，以下內容由 Xavier Wong 提供
擺 Booth 篇/展覽篇
一舨來說，中小企擺booth 都需要尋找一些中介公司，為什麼要找他們?
因為他們大多數手上會有很多各大商場的Booth分拆租用，如果你獨自去查詢商場可租用場地，通常商場要求你租曬整個場，那價錢就會很貴很貴，而商場也不提供任何攤檔的擺設給你，祗有電是免費的，其後一張枱一張凳都是遂一收費。
那麼中介公司有什麼好處?
(注意﹕我們不是場地中介公司，我地都係問中介公司攞場)
首先是價錢，因為是分拆出來，價錢上會比起你獨自租用整個場來得便宜，平的可以去到$500/天，最貴的也是$4000/天左右。
其二是中介公司的好處是，他們會有一個展銷主題，例如你是賣食品的，那你可跟中介公司講你的產品是食品，那他們就會給以食品為主題的展銷場地給你選擇，好處是當整個場地也是食品，那會更吸引到客人入來參觀。
其三，一些中介公司的場地，他們的展銷場會有簡單美麗的裝飾，你可免去時間想及再花錢怎樣裝飾場地，客人從觀感上不會像散貨場。
怎樣選擇場地中介公司?
選擇中介公司也有學問，不同的中介公司，他們做的市場也不一樣。
一些中介公司主力做一些領展其下的商場，他們價錢上普片是比較平宜，由$500-$1500左右，但偶然也有一些價錢貴小小的場地。而領展的場地，一般展銷場都沒有裝修及主題，普遍是一些比較殘舊的展銷枱，產品及食品混合的場地。
不同中介公司 Booth 的質素可以差好遠，有幾會直接影響路人觀感及品牌形像!
一些中介公司主力做私人商場，什麼是私人商場，恆基、長和等其下的商場，私人商場的價錢一般是$1200-$3000/天不等，跟頭先一樣，他們偶然也會有一些價錢貴小小的場地。而私人的場地，一般都有裝修及主題，普遍是一些比較好的的展銷枱。
如何選擇展銷場地?
場地是好影響你的生意額的，首先領展其下的地場偏佈全香港，無論香港南區到天水圍元朗也會有，你的需了解你的產品銷售群是屬於那一類，例如一些人口老化了的屋村，他們普遍銷費能力比較低，那麼假如你的產品定價太高會是比較難銷售出，但假如你的產品銷費群是指向老人的，那麼這一些場地就會好適合你，反之私人商場的銷費力會比較高。
場地的人流，以人流計算，領x其下的商場星期一至五，早上下午，人流也可以接受的，晚上基本上人流會很少。私人商場，星期一至五早上及中午的人流不算太多，晚上就會稍為改善，因為放工時間，但到了星期六日或公眾假期，私人商場的人流整天也會很多，不同區的客人也可以接觸得到。所以最後選擇那一個場，要看你們自己取捨。
展銷攤位位置選擇
一般都是建議選擇最外面的攤檔，但也要留意番你選擇對外的攤檔對著的是什麼，如果是對著電梯或正門的，那人流一定比較好，客人第一眼也會見到你的產品先。反之選擇入面的攤檔，人流也會較為小。
不同的位置，價錢也不一樣的，最外面的一般價錢會稍高，反之入面的價錢會比較便宜。
另外，如果想喺地鐵擺，可以參考李根興的文章
租用展銷場地流程
- 聯絡中介公司
- 中介公司會提供你需要的場地FLOOR PLAN給你
- 選擇你要的位置
- 付錢給中介公司(一般先落1/3訂，到最後一星期付尾數)
- 完成，等待展銷期來臨
- 錢袋銷售記數紙
- 凳
- 一塊足以蓋到你所有產品的布(一些場或會提供)
- 電拖板
- 假如你需要用電熱水煲及電爐，你需要跟中介公司說明
展銷場的銷售員
如何選擇銷售員，我建議一定要選擇一些不怕醜，性格爽朗，外向，喜歡說話的，當然有零售經驗的會更好，為什麼，因為內向、怕醜、少說話會很影響客人對你產品的認識，另外有一些潛在客人，可能是路過的，但當聽到銷售員介紹產品時可能會對你產品產生興趣，從而增加你的銷售及人流情況，最後當然是要銷售員熟悉你的產品。
另外銷售員亦要一些技巧，假設你的產品是食品，銷售參茸海味或會提供即場試飲，那麼記著，不要整定幾杯擺放係度比客人攞黎飲，盡可能要等客人望兩望，或經過時先即時倒些熱辣辣的給客人試飲，如果杯試飲是暖或已放涼，客人就可以好快飲完跟著走開的，不會聽銷售員講解你的產品，我們是要令到個檔口多些人圍著，跟著運用羊群心理，其他客人就會好奇心促使下，行來你的攤檔。
另外，要定時查問銷售同事接觸到的客人對你的產品會有什麼疑問，了解客人對你的產品疑問，會對你日後培訓銷售員會有好大幫助。
展銷場前期準備
不論私人底領展的場地，一般都需要以下幾樣物資。
1. 你的產品
2. 展銷產品的架
3. 展銷產品的宣傳物品
4. 錢袋
5. 銷售記數紙
6. 凳
7. 一塊足以蓋到你所有產品的布(一些場或會提供)
8. 電拖板
好賣得的 Promoter 不易找，如果你已經試過揾但唔成功，我地應該可以幫到你，或如果你有什麼有趣事想分享，不坊 Share 給我們!